Упельсинкина страница
Тексты

Христианство

Список 1 с писем страдальческих священнопротопопа Аввакума.

Глава 1. О исповедании православныя веры вкратце

(л. 63 об.) Неключимый раб пресвятыя и животворящия и неразделимыя Троицы, Отца и Сына и Святаго Духа, единаго истиннаго Бога, юзник по вере и церкви Христове и поборник благочестивых отеческих догматов [протопоп Аввакум возлюбленным] святым братиям сионьским чадам, всем православным христианом афетороссийского рода радоватися и умудрятися, вкупе же и здравствовати в непорочной вере Спасителя Господа нашего Иисуса Христа Сына Божия, воспитоватися и возрастати во святых благочестивых отеческих догматех кроме всякия еретическия скверны и порока.

Молю вы, чада церковная, и коленом вашим касаюся, аще обретох пред вами благодать, помина[й]те мя в молитвах своих, да даст ми ся слово проглаго[лати] (л.64) устом моим на сопротивника Божия и на отступники благочестиваго стараго нашего православия. Не буди ми похвалитися, истинну бо реку. Яже аз вся священная божественная писания проидох, ветхая и новая, а не обретох нигде же, что в последняя времена испра[ви]ти веру добре и обрящут истинну. Несть! Несть! Но вси пророци и апостоли Христовы
и учители и вси святии отцы вопиют согласно Христу, истинному своему пастырю и учителю, яко в последняя времена востанут лжехристи и лжеучители и священная писания исказят и [п]ревратят и отступят от веры, и внесут ереси погибельныя и Христа Бога истиннаго креста отметатися будут, Духа Святаго похулят и вся отеческая предания превратят и писания святых загладят и по своей похоти начнут писати. Изменят бо времена и закон беззаконнующий и завет наведут с прелестию (л. 64 об.) и осквернят священие и пр[еставят] учащение и дадят вне огнушение скажено. И не будет святыя службы во олтарех, ни приношения истиннаго, яко вси уклонятся от Бога святаго и лестцу веру имут. И даст прескверный вместо креста Спасителева подобно свое знамение. Тако есть писано во святых кн[и]гах “и прелестнику поклонятся живущи на земли и, - по писанию Богословлю, - их же имена не написана суть в книгах животных”. Чтый да разумеет и блюдет ризы своея, да не наг ходит. Время бо сие люто зело.

Написах сие краткое писание от болезни и туги сердечныя. Видех многих зрящих и не видящих, уши имущих и не слышащи, и зде имеяй уши слышати, да слышит с великим вниманием. И смотри всяк правоверный недреманным оком и внимай разумно и блюдися зело от ложных и своеумных (л. 65) мудрований и по апостолу: “вся искушающе, доброе содержите и от всякия злыя вещи отгребайтеся, яже врежают душа наша”. О них же и правила святых отец возбраняют: “Аще кто и мало что отметает от закона – весь отметает закон”, но аще и мало нечто. Аще и худое что подвигнут – анафема да будет!


Памятники старообрядческой письменности. – СПб, РХГИ, 1998. С. 279-281.

© "Упельсинкина страница" - www.upelsinka.com
Пользовательского поиска

Наши проекты:

Скандинавские древности

Современное религиоведение

Наши партнеры:

Реклама:

Книги по теме:

Букинист

Другие издания:

OZON.ru

Реклама: